Programa definitivo de actos do Día da Galiza Martir

• 13:00 h. HOMENAXE INSTITUCIONAL A ALEXANDRE BÓVEDA.
o No monumento a Alexandre Bóveda na Caeira en Poio. Intervirán:
-Anxo Quintana (Vicepresidente da Xunta de Galiza)
-Luciano Sobral (Alcalde de Poio)
-Fernando Quintela (Presidente da Fundación Alexandre Bóveda)

• 14:00 h. XANTAR DE ENTREGA DO II PREMIO DIA DE GALIZA MARTIR Á RECUPERACIÓN DA MEMORIA HISTÓRICA AO HISTORIADOR DIONISIO PEREIRA
o No Pazo de Cultura, Rúa Alexandre Bóveda, Pontevedra.
- Anxela Bugallo (Conselleira de Cultura)
- Xoán Carlos Garrido (Fundación Alexandre Bóveda)
- Dionisio Pereira

• 18:30 H. CERIMONIA DE ANIVERSARIO NA CAPELA DE SAN AMARO (PONTEVEDRA)

• 19:00 H. ACTO CÍVICO DIANTE DO SARTEGO DE A. BÓVEDA
o No Cemiterio de San Amaro (Pontevedra)
- Xosé Luís Bóveda (Vicepresidente da Fundación A. Bóveda e fillo de A. Bóveda)
- Fina Casalderrey (Escritora)

• 20:30 H. HOMENAXE POLÍTICA NO MONUMENTO A A. BÓVEDA
o Na Praza de Curros Enríquez diante do monumento a Bóveda (Pontevedra)
- Francisco Jorquera (Senador do BNG)

O vicepresidente da Xunta de Galiza, Anxo Quintana, intervirá na ofrenda institucional

Un ano máis intervirá o vicepresidente Anxo Quintana na ofrenda institucional organizada pola Fundación Alexandre Bóveda coa colaboración do Concello de Poio. Este acto terá lugar na Caeira, diante do monumento a Alexandre Bóveda. Xunto con Anxo Quintana, intervirá o Alcalde de Poio e o Presidente da Fundación “Alexandre Bóveda”.
Anxo Quintana vén rendindo tributo a Alexandre Bóveda desde que tomou posesión do seu posto de Vicepresidente da Xunta de Galiza, asumindo así a responsabilidade de lembrar a quen as institucións galegas tanto deben polo impulso que deu ao desenvolvemento do noso autogoberno como motor do proxecto de Estatuto de Autonomía aprobado o 28 de xuño de 1936.

O senador Francisco Jorquera será o encargado de intervir na homenaxe política

Un ano máis, no marco do aniversario do fusilamento do que fora secretario de organización do Partido Galeguista, celebrarase na praza de Curros Enríquez unha homenaxe política que poña en evidencia a vixencia e vitalidade do ideario nacionalista que profesara Alexandre Bóveda.
O encargado esta ano da intervención política será o senador do BNG, Francisco Jorquera, e será baixo o seu busto e o anagrama do PG que presiden a praza de Curros Enríquez en Pontevedra, ás 20:30.

A escritora pontevedresa Fina Casalderrey será a encargada de intervir no acto cívico diante do sartego de Boveda

Este ano 2007, será a escritora Fina Casalderrey a que intervirá no acto cívico diante do sartego de Alexandre Bóveda. Este acto de lembranza cidadán de Alexandre Bóveda ten un sentido aberto e mesmo poético no que no marco do cemiterio se fai unha exaltación da vida e da esperanza que segue adiante a pesares dos que consideraron que ía pór remate coa barbarie desatada no 1936.
O acto celebrarase ás 19:00 h. no cemiterio de San Amaro.
Fina Casalderrey (Xeve, Pontevedra 1951) é mestra e escritora cunha ampla obra escrita para nenos e mozos. Para o público infantil publicou: Dúas bágoas por Máquina (Xerais 1992), novela, premio Merlín de Literatura infantil 1991; A noite dos coroides (1993), novela; Chamizo (Xerais 1994), novela; O misterio dos fillos de Lúa (1995), novela, Premio Barco de Vapor 1995 e Premio Nacional de Literatura Infantil e Xuvenil 1996; O estanque dos parrulos pobres (1996), novela, premio Edebé de Literatura Infantil 1996; Prohibido casar papá (1996), novela, Lista de The White Ravens 1998; ¡Puag, que noxo! (1997), conto; Podesvir (1997), conto; Unha raíña negra (1998), conto; Cuca e o abrigo marrón (1998), conto; Nolo e os ladróns de leña (1998), conto; Ás de mosca para Anxo (1998, Xerais 2002), novela; Pimpín e dona gata (1999), conto; O misterio do cemeterio vello (1999), novela; Unha pantasma branca (2001), conto; O avó é sabio (2002), conto; O avó sae de paseo (2002), conto; A avoa non quere comer (2002), conto; A avoa ten unha menciña (2002), conto; Derradeira carta ós Reis Magos (Xerais 2002), conto; ¿Quen me quere adoptar? (Xerais 2005), conto; A lagoa das nenas mudas (Xerais 2007), novela e A Pomba e o Degolado (Xerais 2007), novela.
Premio Irmandade do Libro á Autora do Ano, 2006.

Cartaz «Día da Galiza Mártir» 2007

Cartaz que difundirá os actos do «Día da Galiza Mártir» deste ano.

II Premio «Día da Galiza Mártir» á recuperación da Memoria Histórica

A Fundación “Alexandre Bóveda” fai público o nomeamento da persoa á que se lle outorga o presente ano a distinción inaugurada en 2006, co gallo do ano da memoria, para recoñecer o labor de recuperación da memoria histórica no noso país.

A persoa homenaxeada o presente ano será o historiador Dionisio Pereira, polo seu labor investigador e divulgador da represión franquista, dando a coñecer acontecementos, lugares e nomes que outros quixeron borrar de xeito violento da nosa lembranza, e promovendo a organización de actos de rehabilitación e reparación das vítimas da barbarie fascista.

O acto de entrega levarase a cabo durante un xantar que terá lugar o propio 17 de agosto, día da Galiza Mártir, no Pazo da Cultura en Pontevedra, ás 14:30 h.

Aqueles que queiran asistir poden facelo inscribíndose no enderezo electrónico galizamartir@gmail.com ou chamando ao teléfono 670514960.

Este xantar insírese no programa de actividades que ten lugar para lembrar o fusilamento de Alexandre Bóveda, que inspirou hai 65 anos á Irmandade Galega de Arxentina, presidida por Castelao, para instituír o día da Galiza Mártir, co que lembrar as vítimas da represión franquista.

Presentación «Día da Galiza Mártir»

Esta páxina pretende informar ao día de todo o referente á celebración do «Día da Galiza Mártir» cando vén de cumprirse o 65 anos por iniciativa de Castelao.